كلّ عيدٍ وأمّي ستُّ النساء
جهاد المثناني
..........
من ضِحكة أمّي عِيدها سَوِّيت
وبوجه أمِّي ترتسم الأقمَار
وبْـإسم أمّي عِيدها سَمِّيت
و بـكفّ أمّي الـوَرد والنوّار
مِن ريحةِ أمّي لْبِسْتْ وتحَنّيت
ومِن ريحة أمِّي تـغِير هَا الأزهار
أمّي قصيدة مْـرصّعَـة بِالبِـيت
ومِن غِير أمّي ما نقول أشْعار
أمّي شفَـرها وْصِفْت يَا مَا روِيت
وفـ قَـلب أمِّي تكتـنز الأسْـرار
أمّي ضِيَاهَا وصِفْت مَا وَفِّيت
كِـ تْـغيبْ أمّي هَا الوتَد ينْـهَـار
أمّي غَلَاهَـا كْبِير مَهْمَا حكِـيت
كُـلّ الحَكايا فـ حُـبها تِـصغَـار
ومِن شِيبْ أمّي للضِّيا غـَنّيت
ومِن شِيبْ أمّي اللِّيل صَار نهار
وفـ حُضن أمّي في الدّفى ودفِيت
وفـ حُـضن أمّي مَا أجملُو المِشوار
يا سِبْـحةِ أمِّي لا تْـخَـلّي البِـيت
يا صْلَاتـها يَا وجهـها المُـسْرار
يا عُمر وَلِّي .. لـحُـضنها حَنِّيت
مَـهما كبِـرنَـا أمي تـرانا صْغَـار
أمّي وأمّي .. نقُـول مَا مَلِّيت
ونْـقُـولها مِ الألف لِلمِـليار
يَا عِيد أمّي فِي الحَشَا تخَـبِّـيت
وبـ عِـيد أمِّي تبتسِم الأشْجَـار
يا خَـطو أمِّي في التّـرابْ مْشِيت
الفُـلّ يِـنبت ..أرضنا تخْـضار
يا عُمر يكفي من الشّقا عدّيت
كِـ نقول أمّي .. ما تهمّ أعمار
كِـ نقول أمّي .. تنْـتفِـي "يَا لِيت"
تـغـَنّي السقيفَـة يْفُـوح وسْط الدّار