هَجْرْ القلب :نص _ الشاعرة :: فردوس النجار / سوريا
يَلِّي غلبتوا الروح.. بستأذن أنا..
من كل عمري.. وكل لحظات الهَنا!
تا وَصِّلْ المكتوب.. غَطَّيتْ الشمس..
وُنْهَرْتْ كل الكون.. ومحيت الغِصَص!
صرَّختْ فوق الريح.. وعبَرتْ المدى
وُمرَّيت بالغيمات.. إمسِك ساعدا
تا عَلِّما الغياب.. كيف بيِنغمِس!
وتانَبِّهَا بالليل تسأل خاطري..
ألفين مرة تْعِيْدْ.. عالقلب الطري
ان كانت نوايا الدهر.. تَفْريْدْ الغَرِسْ!
مَرمَرت إيدَيِّي.. وُعَذَقْتُن بالدمع
ومشيت حتى حفيت.. سعدي ماانقشع!
قْلـْتْ بزنودي بقهر شجون الحزن
قْلـْتْ بثمار الحب رح عَمِّرْ ضِيَعْ!
شوصار بكفوفي.. خطوطن تنقطع؟!
شوصار بعيوني.. بعد طيب النظر..
حتى الفجر يِبعِد صباحو وُينْشلِع؟!
وشو صار (بالدنيا) .. على خَيْلي العنيد؟
تِدْعَسْ بقلبي.. وُالمَسَرَّة تِنْمنِع!
